კაცობრიობის მიერ შექმნილი კულტურა ცხადყოფს, რომ ადამიანი ყოველთვის მიისწრაფოდა ბედნიერი ცხოვრებისაკენ და მუდმივად ეძებდა მისი მიღწევის გზებს. ,,კალაგია“ და საღმრთო წერილები გვასწავლის, რომ ადამიანის ბედნიერი ცხოვრების წინაპირობა – მისი სულიერი წინსვლაა. მაგრამ, როგორი ცხოვრებით უნდა მივაღწიოთ ამას, რანაირი მოქმედებებით და რა საშუალებებით? ეს რომ კარგად გავიგოთ და სათანადოდ ვიმოქმედოთ, ამისათვის პირველ რიგში ალბათ საჭირო იქნება ვეცადოთ შევიძინოთ ცოდნა ჩვენი შემადგენლობისა და სტრუქტურის , ჩვენში არსებული ყველა მნიშვნელოვანი რგოლის ფუნქციისა და შესაძლებლობების შესახებ და შეგვეძლოს მათი სწორი გამოყენება.
ბიბლიაში ნათქვამია: „ …შექმნა ღმერთმა კაცი, თავის ხატად შექმნა იგი, მამაკაცად და დედაკაცად შექმნა ისინი“(დაბად. 27). მაგრამ ადამიანისთვის ადვილი არ არის შეიცნოს ღმერთი, რათა მასთან ანალოგიით შეიცნოს თავი თვისი. თუმცა ბიბლიაში ესეც წერია : „არ არსებობს დაფარული, რომ არ გამოჩნდეს და არც რა საიდუმლო, რომ არ გამჟღავნდეს“.(მათ. 10.26) ამგვარად, ადამიანს უკიდურესად ესაჭიროება ცოდნა თავის შესახებ, რადგან არცოდნა ხშირად ხდება სავალალო შედეგის მომტანი , უარყოფითად აისახება მის ბედისწერაზე. ამიტომ არ იყო შემთხვევითი, რომ უკვე ძველთაძველი დროის სიღრმეში ხელდასმულთა, ბრძენთა და ქურუმთა წრეში გაჩნდა მოწოდება: ,,შეიცანი თავი შენი და შეიცნობ ღმერთს“. მაგრამ შეუძლია კი თუნდაც ადამიანის ტვინს, მიუხედავად თავისი სასწაულთან მიახლოვებული სრულყოფილებისა, სრულად შეისწავლოს თუნდაც თავისი თავი?
მეცნიერები აღიარებენ, რომ იგი არ ექვემდებარება ამომწურავ შესწავლას. თავის ტვინის ფუნქციები და მისი ინტეგრალური მოქმედების შიდა მექანიზმები ჯერ არ არის ბოლომდე გამორკვეული. რაღა უნდა ითქვას იმ მრავალ სისტემაზე, წარმონაქმნზე, არხსა და მერიდიანზე, გამოსხივების წყაროსა და მიმღებზე, იმ ცეცხლოვან ცენტრებსა და სტრუქტურებზე, რომლებიც განუწყვეტლივ მოქმედებენ ადამიანში, მის უხილავ წმინდამატერიალურ სხეულებში. შესაძლებელია კი, რომ ადამიანმა შეაღწიოს მათი ფუნქციონირების, ურთიერთქმედების საიდუმლოებებში, იდუმალებით მოცულ მოვლენებში, რომლებიც ალბათ მხოლოდ ნაწილობრივ შეიძლება აღიწეროს თანამედროვე ფიზიკის ურთულესი თეორიებით ( ველების კვანტური თეორიით, ტალღური ველების და ტალღური პროცესების თეორიებით, ზემაღალი სიხშირის ელექტრომაგნიტური გამოსხივების თეორიით და სხვა)? შესაძლებელია ისინი შეისწავლოს და აღწეროს მეცნიერებამ ახლო მომავალში, როდესაც ადამიანი შეძლებს შექმნას სულიერი ხელსაწყოები და ახალი, ჯერ არარსებული თეორიები.
ჯერ კიდევ მეფე დავითი ( XI ს. ჩ.წ.ა) საუბრობდა ადამიანის მოწყობის საოცრებაზე: ,,გადიდებ შენ იმისათვის, რომ მე საოცრად ვარ მოწყობილი, საოცარია შენი საქმეები და ჩემი სული სრულად აცნობიერებს ამას (ფსალმ.138,14). ცოდნა ადამიანის სხეულის რთულ შემადგენლობაზე არსებობდა უკვე ძველ საუკუნეებში. იგი გადაეცემოდა მასწავლებლისგან მოსწავლეს ზეპირსიტყვიერებით, მოგვიანებით კი ასახვა ჰპოვა ძველი აღმოსავლეთის რელიგიურ- ფილოსოფიურ ნაწარმოებებში. ეს ცოდნა დიდხანს იმყოფებოდა საიდუმლო, დაფარული ცოდნის სტატუსში, თუმცა ცივილიზაციისა და კულტურის განვითარებასთან ერთად იგი უფრო ხელმისაწვდომი გახდა ადამიანების ფართო წრისათვის, რომელიც დაინტერესებული იყო ადამიანისა და სამყაროს შესახებ თავისი ცოდნის გაფართოებით და გაღრმავებით.
არსებული ცნობების შევსება ახალი ცოდნით შესაძლებელია ხდებოდა ინტროსპექტიული ხედვის მქონე ინდივიდების მეშვეობით, რომელთა გარკვეული რაოდენობა ყოველთვის ცხოვრობდა დედამიწაზე , კერძოდ იმ დროიდან, როცა ადამიანმა შეიძინა ცნობიერება და გახდა მოაზროვნე არსება.
ადამიანის მიერ ჭეშმარიტების სწავლის პროცესში უმაღლესი არსებების ჩარევის ფაქტი სულ უფრო აშკარა ხდება. ძნელია დარწმუნებით იმის თქმა, რომ ჩვენ როდისმე შევძლებდით დამოუკიდებლად ჩვენი თავის შემეცნებას ცოდნის იმ ხარისხითაც, რომელსაც დღეს ვფლობთ, თუ არა სხვა სამყაროს ინდივიდებისგან გამოწვდილი დახმარების ხელი,რომლის მეშვეობით სულიერად განვითარებული ადამიანები იღებდნენ გარკვეულ ინფორმაციას მათი სხეულის სულიერ შემადგენლობაზე და თავიანთი უნარებისა და საშუალებების შესახებ.
ოკულტურ ლიტერატურაში დაფიქსირებული და შენახულია უამრავი შემთხვევა, როდესაც ადამიანის ცნობიერებამ გაარღვია ტრანსფიზიკური სივრცე და შეიჭრა მის სიღრმეებში. ხშირად უხილავი რეალობა თვითონ შემოიჭრებოდა ადამიანის ცნობიერებაში და ტოვებდა იქ თავის ღრმა ნაკვალევს. ადამიანი იღებდა ეგრეთწოდებულ ,,რელიგიურ გამოცდილებას“, რომელიც ეხმარებოდა მას განვითარების სწორ გზაზე დადგომასა და მთელი შემდგომი ცხოვრების მანძილზე მასზე დამაჯერებელ სვლაში.
თანამედროვე სამეცნიერო სამყარომ უკვე დაიწყო ზემოთ მოყვანილი ფაქტების რეალობად აღიარება. სხვა სამყაროებიდან ინფორმაციის მიღების შემთხვევებს, რომლებიც აუწყებს კაცობრიობას წარსულში მომხდარი ან მომავალში მოსალოდნელი მოვლენების, სამყაროს საიდუმლოებების შესახებ, მეცნიერები უწოდებენ ადამიანის ,,ცნობიერების გასვლას მსოფლიო მონაცემთა ბანკში ან ინფორმაციულ ველში“.
არსებობს აგრეთვე აზრი, რომ დედამიწაზე სამეცნიერო სამყაროში შემუშავებული ყველა დიდი იდეა და თეორია გაჩნდა არა მეცნიერთა მკაცრი ლოგიკურ-განსჯითი მოღვაწეობის, არამედ ზეშთაგონების, ინტუიციის, გონების გაბრწყინებისა და წინასწარი ჭვრეტის გზით.
დიდად სამწუხაროა, რომ პირადი გამოცდილების არქონის გამო, რწმუნებანი ჭეშმარიტების დადგენის ზემოთ ჩამოთვლილი გზების შესახებ აღიქმება უნდობლად და უარყობითი წინასწარ განწყობით. ამ მიზეზით კაცობრიობის უმეტესი ნაწილი არ აღიარებს ბუნებაში სიღრმისეული მოვლენებისა და სამყაროს ფარული კანონების არსებობას.
და მაინც, ბევრ გონიერ და სულიერად განვითარებულ ადამიანს არ ეპარება ეჭვი იმ აზრის სისწორეში, რომ ადამიანის ცნობიერების გაფართოება სამყაროსა და მასში მოქმედ კანონებზე, ადამიანზე, მისი ცხოვრების ძირითად დანიშნულებაზე, სამყაროს ხილულ და უხილავ ბინადართა შესახებ, უკიდურესად აუცილებელია კაცობრიობის კულტურის შემდგომი პროგრესის,მისი გასულიერებისა და დედამიწაზე ცივილიზაციის შენარჩუნებისათვის.
მრავალი საუკუნეების მანძილზე კაცობრიობის სულიერად და გონებრივად განვითარებული ნაწილის გულმოდგინე მცდელობით, რათა ჩაწვდეს ჭეშმარიტ ცოდნას ადამიანის შესახებ და უმაღლესი სამყაროების არაერთგზისი დახმარებისა (სამყაროს საიდუმლოებათა ეტაპობრივი გახსნით), მიღწეულ იქნა ის შედეგი, რომ ადამიანმა დღეს უკვე იცის ბევრი რამ თავის შემადგენლობისა და სასწაულებრივი უნარების შესახებ. იცის, რომ გარდა თავისი ხილული მყარი სხეულისა (რომელიც მეცნიერებმა საკმაო წარმატებით შეისწავლეს), მასში არსებობენ რიგი წმინდამატერიალური და სულიერი სხეულები ან „პრინციპები“, როგორც მათ მახატმები უწოდებენ. მათ გააჩნიათ ურთიერთკავშირთა სპეციფიკური თვისებები, მრავალსახეობრივი ფუნქციები და მოქმედების პროგრამები.
ადამიანი – დედამიწის მკვიდრი – ურთულესი, გენიალურად მოწყობილი არსებაა, რომელსაც გააჩნია ფაქიზად და გონივრულად მოფიქრებული მრავალრიცხოვანი და მრავალნაირი საკრალური ორგაოების იერარქია თავის მვრივ სხეულში: ლოგოსი, მონადა, ღვთიური არსი, წმინდამატერიალური სხეულები, საქმიანი შემოქმედი სხივების და ენერგეტიკული ველების გენერატორები, მიმღებები და გადამცემლები და კიდევ ბევრი სხვა რამ, რაც მეცნიერებას ჯერ შესწავლილი არა აქვს.
მასში ბევრია უმნიშნელოვანესი ენერგეტიკული ცენტრები, არხები, მერიდიანები და ქსელები. ყველა მათგანი ასრულებს მნიშვნელოვან საქმეს – აკისრია მნიშვნელოვანი როლი ადამიანის ცხოვრებასა და შემოქმედებაში. პროცესები, რომლებიც მიმდინარეობს თვითოეულ მათგანში, ექვემდებარება გარკვეულ, მხოლოდ მათთვის დამახასიათებელ კანონზომიერებას. მრავალსახოვანია მათი მოქმედება და გააზრებულია ამ მოქმედების შედეგები.
ყველამ კარგად უნდა გაიაზროს ის ფაქტი, რომ დედამიწაზე, ცივილიზირებულ და პროგრესირებულ საზოგადოებაში დიდად დაფასებული ვერცერთი ადამიანის მიერ შექმნილი შედევრი ვერ შეედრება უმაღლესი შემოქმედის მიერ შექმნილ საოცრებებს. ასეთ საოცრებას წარმოადგენს პირველ რიგში „ბუნების გვირგვინი“ – ადამიანი.
ეზოთერულ ლიტერატურაში არაერთხელ გამოქვეყნდა საინტერესო ცნობები ადამიანის საკრალური შემადგენლობის, მისი უნარების და შესაძლებლობების შესახებ, მაგრამ ოაიციალურმა მეცნიერებამ ვერ მიიღო ისინი, როგორც სინამდვილის ამსახველი ფაქტები, თავისი წამყვანი პრინციპების გამო ( რადგან მათი ჭეშმარიტება ექსპერიმენტებით ვერ დასტურდებოდა).
მეცნიერებამ, თავისი ბრწყინვალე მიღწევებით კვლევების მრავალ დარგში, დიდი პროგრესით ტექნიკაში და ცივილიპაციის განვითარებაში, მოიპოვა დიდი ავტორიტეტი და ნდობა დედამიწის მოსახლეობაში. ამიტომ, მის მიერ არ აღიარებულმა ეზოთერულმა ცოდნამ ადამიანის შესახებ არ ჰპოვა საკმარისად ფართო გავრცელება, თუმცა ეს ცოდნა იყო და არის დიდათ მნიშვნელოვანი ადამიანისათვის, მის სულიერ ზრდისათვის. როგორც აქ უკვე არაერთხელ აღინიშნა, ადამიანის ინდივიდუალური განვითარება და სულიერი სრულყოფა არის უკვდავების და მარადიული ცხოვრების მიღწევის უტყუარი გარანტი.
ყველა დროსა და ეპოქაში რელიგიის მცოდნენი და ეკლესიის ჭეშმარიტი მსახურნი მოუწოდებდნენ ადამიანებს უმაღლესი შემოქმედის და ღვთიური ძალების მიმართ პირადი რწმენის გაძლიერებისაკენ, რელიგიურ სწავლებებში და საღმრთო წერილებში არსებული საკრალური ცოდნის ათვისებისაკენ, იქ მოყვანილი ცხოვრების წესებით ცხოვრებისაკენ.
ბუნებრივია, რომ მათი ეს მცდელობები ხელს უწყობდა ადამიანებში სისასტიკის და მათ მიერ ისეთი საქციელის ჩადენის რაოდენობის შემცირებას, რომელიც მომაკვდინებელია პიროვნების სამშვინველისათვის. ადამიანების მიერ ერთმანეთის და სხვა ცოცხალი არსებების მიმართ ჩადენილი ბოროტებების რაოდენობა კლებულობდა. მაგრამ, როგორც „კალაგია“ გვასწავლის, ადამიანში რწმენის არსებობა – ეს მისი არსის განვითარების, მისი სიღრმისეული საკრალური შემადგენლობის, მხოლოდ ერთ-ერთი აუცილებელი კომპონენტია, რომელიც ხელს უწყობს მას, რათა მიხვდეს რომ ჰარმონიული თანაარსებობა საზოგადეობის ხვა წევრებთან და მთელ ცოცხალ ბუნებასთან, მისწრაფება უმაღლეს შემოქმედთან სულიერ გაერთიანებისაკენ, აუცილებელია ადამიანისათვის.
„კალაგიაში“ აგრეთვე მითითებულია იმაზე, რომ ფრიად სასურველია ადამიანში ერთდროულად არსებობდეს მაქსიმალურად განვითარებული კოსმიური ენერგიის შვიდი ასპექტი – ე. წ. „ცეცხლის ენა“: იმედი, რწმენა, სიყვარული, სიხარული, მისწრაფება, ცოდნა და მოქმედება.
ისინი სჭირდება ადამიანს, რათა მას გაჩნდეს უნარი, შეძლოს და გადალახოს ცხოვრების გზაზე შემხვედრი ყველა დაბრკოლება, ისე, რომ არ დაარღვიოს მსოფლიო ს კანონები – თავისი მოქმედებებით არ შეუწყოს ხელი რთული სიტუაციების წარმოშობას ან გამწვავებას, რომლებსაც მივყავართ ტრაგედიამდე, კატასტროფამდე და დიდი რაოდენობით ადამიანების ან სხვა ცოცხალი არსებების დაღუპვამდე – დედამიწაზე ბოროტების რაოდენობის ზრდამდე.
ყველაფერ ზემოთ ნათქვამიდან ბუნებრივად და ლოგიკურად გამომდინარეობს ის დასკვნა, რომ დედამიწის მოსახლეობის დიდ ნაწილში საკუთარი თავის და სამყაროს შესახებ ადამიანისთვის დიდად საჭირო ცოდნის უკმარისობა – ეს ის ფაქტორია, რომელსაც მივყავართ ძალიან ცუდ შედეგამდე ჩვენი პლანეტის მოსახლეობისთვის.
როგორც ჩანს, საჭირო ცოდნა არასაკმარისი ინტენსიურობით მიეწოდებოდა ადამიანთა მასას და ამიტომ ბოროტების რაოდენობა დედამიწაზე საგრძნობლად პროგრესირებს. როდესაც ჩვენ მივაღწევთ ფიზიკურ და გონივრულ განვითარების ზენიტს, მაგრამ არ გვექნება არავითარი საშუალება, რათა ავმაღლდეთ სულიერი ზრდის ჩვენს ციკლში, ჩვენი პროგრესი ბოროტების მიმართულებით შეჩერებული იქნება ისევე, როგორც ჩვენი წინაპრები – ლემურიელები და ატლანტები იყვნენ შეჩერებული თავის ამდაგვარ პროგრესში, დედამიწაზე საშინელი კატაკლიზმური ცვლილებებით.
ბუნებაში არსებობს სამგვარი (სულიერი, გონებრივი და ფიზიკური) ევოლუციის პროგრამა და იგი უთუოდ უნდა იყოს განხორციელებული. გამოსავალი ზნეობრივ – ეკოლოგიური კრიზისიდან, რომელიც კაცობრიობას დაღუპვით ემუქრება, არსებობს. აღნიშნულ მდგომარეობიდან გამოსვლის ერთ – ერთი უტყუარი გზაა – დაჩქარებული ტემპით ადამიანის ცნობიერების სრულყოფა, ცხოვრების მომხმარებლური ორიენტირების სულიერით შეცვლა და ყოფიერებაში ზნეობრივი კანონების დაცვა.
ზემოთ აღნიშნულიდან გამომდინარეობს, რომ ცნობიერების გაფართოებისა და გამთლიანებისაკენ მისწრაფება ყველა ადამიანის უპირველეს ამოცანათ უნდა იქცეს. ეს კი შეუძლებელია ჩვეს ახლობელ გარემოს, აგრეთვე შორეული სივრცეების, უხილავი სამყაროების, და საკუთარი საკრალური შემადგენლობის შესახებ ცოდნის გაფართოების და ადამიანის მთელი მატერიალური ნაწილის გასულიერების გარეშე.
ადამიანი დიდი ენერგიების მფლობელია. უდიდესია მათი გავლენა დედამიწაზე და კოსმოსში მიმდინარე პროცესებზე. აბსოლუტურად დაუშვებელია ამ ენერგიების გამოყენება გარემოს საზარალოდ, რადგან ამას მივყავართ დედამიწაზე და მთელ სამყაროში ბოროტების რაოდენობის ზრდისაკენ, მის სწრაფ პროგრესისაკენ. ამიტომ ყველა საღად მოაზროვნე ადამიანის ვალია მოინდომოს, ეცადოს და შეძლოს თავისი ცოდნის გაფართოება სამყაროების, მათში არსებული ძალების და ენერგიების, მათი განუსაზღვრელი უნარების და შესაძლებლობების შესახებ. აუცილებელია რათა ადამიანის მიერ შეძენილი ცოდნა იყოს ჭეშმარიტი, რადგან მხოლოდ იგი წარმოადგენს ადამიანის სწორი მოქმედების (რომელიც ანვითარებს მის ინდივიდუალობას) გარანტს.
(გაგრძელება იქნება)
ოფელია ლომაია
ofelialomaia 